Հունիսի 23-ին Մարսել-Երևան հատուկ չվերթով Ֆրանսիայից Հայաստան ժամանեց բժիշկների երկրորդ խումբը: Առաքելության խմբի անդամներին «Զվարթնոց» օդանավակայանում դիմավորեցին Սփյուռքի գործերի գլխավոր հանձնակատար Զարեհ Սինանյանը, Հայաստանում Ֆրանսիայի դեսպան Ժոնաթան Լաքոթը, Առողջապահության փոխնախարար Անահիտ Ավանեսյանը և Գլխավոր հանձնակատարի գրասենյակի ղեկավար Սառա Անջարգոլյանը:
ՀՀ սփյուռքի գործերի գլխավոր հանձնակատարի գրասենյակն այս նախաձեռնությունը կյանքի կոչեց ՀՀ առողջապահության նախարարության և Հայաստանում Ֆրանսիայի Հանրապետության դեսպանության հետ սերտ համագործակցությամբ:
«Ֆրանսիայից արդեն բժիշկների 2-րդ խումբն է, որ մեր գրասենյակի անմիջական ներգրավվածությամբ գալիս է Հայաստան: Ուրախ ենք, որ այս խմբում երկու հայ բժիշկ ունենք. խմբի ղեկավարն է հանրահայտ ֆրանսահայ բժիշկ Լորան Փափազյանը, և ռեանիմատոլոգներից մեկն էլ Հայկ Վարդանյանն է: Այսպիսով՝ նման նախաձեռնություններից անմասն չեն մնում նաև սփյուռքի մեր մասնագետները»,-նշեց Զարեհ Սինանյանը՝ հավելելով, որ բանակցություններ են տարվում ԱՄՆ-ի, Ուկրաինայի և այլ երկրների հայ բժիշկների հետ նրանց Հայաստանում նման առաքելությունների ներգրավելու համար:
«Մեր տեղացի բժիշկները շատ սրտաբաց ընդունեցին իրենց օտարերկրացի գործընկերներին, և նախորդ խմբի արդյունքներն ամոփոփելով՝ կարող եմ ասել, որ շատ գեղեցիկ համագործակցություն է ստացվել: Մենք պետք է շարունականությունն ապահովենք: Այսօր այս խումբը կհանդիպի նախորդ խմբին, և նրանք կփոխանցեն իրենց տպավորությունները, փորձառությունը: Շատ ջանքեր են ներդրվում, որ նման առաքելոււթյունները հնարավոր դառնան»,-ընդգծեց Առողջապահության փոխնախարար Անահիտ Ավանեսյանը:
Փարիզի և Մարսելի լավագույն բուժհաստատություններից 9 բժիշկներ իրենց առաքելությունը կիրականացնեն «Սուրբ Գրիգոր Լուսավորիչ» հիվանդանոցում և Վնասվածքաբանության և օրթոպեդիայի գիտական կենտրոնում:
Բժիշկների ժամանման մասին տեսանյութը կարող եք դիտել և ներբեռնել հետևյալ հղմամբ՝ https://wetransfer.com/downloads/1fb2108c81edf7fee43c841f3679e84c20200624143616/4beb51?fbclid=IwAR11Nz0hp5AaebZKqbN4onWD3XH3hsaEdcEQuhbV9vK1tP8cBX5YrAK9WZc
***
Սփյուռքի գործերի գլխավոր հանձնակատարի գրասենյակը Հայաստան-սփյուռք հարաբերություններում ռազմավարությունների մշակման և իրականացման հիմնական պատասխանատու մարմինն է: Մեր գործունեության մասին ավելի տեղեկացված լինելու համար հետևեք մեզ սոցիալական մեդիայում՝ @DiasporaHighCommissionerOfficeArmenia կամ պարզապես կապ հաստատեք մեզ հետ Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։ էլ. հասցեով: