Ապրիլի 25-ին Չեխիայում ՀՀ դեսպան Աշոտ Հովակիմյանին ընդունեց Չեխիայի ԱԳ նախարար Տոմաշ Պետրժիչեկը (Tomáš Petříček)։
Նախարարը, ողջունելով ՀՀ նորանշանակ դեսպանին, բարձր գնահատեց Հայաստանի և Չեխիայի միջև ընթացող քաղաքական երկխոսությունը ինչպես երկկողմ և բազմակողմ մակարդակներում, այնպես էլ ՀՀ-ԵՄ համագործակցության շրջանակներում։ Հատկապես շեշտվեց Չեխիայի հետաքրքրվածությունը ԵՄ Արևելյան գործընկերության ձևաչափի պահպանման և ամրապնդման, նրան նոր լիցք հաղորդելու հարցում։
ՀՀ դեսպանը ներկայացրեց Հայաստանի արտաքին քաղաքականության հիմնական առաջնայնությունները, ներքին բարեփոխումների և ժողովրդավարության զարգացմանն ուղղված գործընթացները, տնտեսական, նորարարությունների և բարձր տեխնոլոգիաների բնագավառում համագործակցության հնարավորությունները։ Քննարկվեց բարձրաստիճան այցերի կազմակերպման, երկկողմ և ԵՄ շրջանակներում քաղաքական խորհրդակցություններ անցկացնելու օրակարգը։
Ապրիլի 16-ին ՀՀ դեսպան Աշոտ Հովակիմյանը հանդիպեց Չեխիայի Հանրապետության Խորհրդարանի Սենատի նախագահ Յարոսլավ Կուբերայի (Jaroslav Kubera) հետ:
Ողջունելով ՀՀ նորանշանակ դեսպանին՝ Սենատի նախագահը բարձր գնահատական տվեց երկկողմ միջխորհրդարանական հարաբերություններին, փոխադարձ բարձրաստիճան այցելություններին, տնտեսական համագործակցության աննախադեպ աճին։
ՀՀ դեսպանը հանգամանալից ներկայացրեց Հայաստանի վերջին տարվա իրադարձությունները, բարեփոխումների գործընթացը և արտաքին քաղաքականության առաջնայնությունները։