Ամենայն Հայոց Կաթողիկոսի այցը Հռոմ. 6 հոկտեմբեր 2021 թ․
Վեհափառ Հայրապետը, որ երեկ երեկոյան ժամանեց Հռոմ՝ մասնակցելու միջազգային միջկրոնական համաժողովին, այս առավոտյան ժամը 8-ին ներկա եղավ Քահանայապետական ունկնդրության, Վատիկանի «Պողոս VI» դահլիճում, որից հետո նախ հանդիպում ունեցավ Ֆրանցիսկոս Պապի, ապա Սուրբ Աթոռի պետական քարտուղար Կարդինալ Պիետրո Պարոլինի հետ։ Տեղի ունեցավ հուշանվերների փախանակում։Հանդիպումներին ներկա էին նաև Թուրքիայի Հայոց Պատրիարք Ամեն. Տ. Սահակ Արք. Մաշալյանը և Արևմտյան Եվրոպայի հայրապետական պատվիրակ և Վատիկանում Հայ Եկեղեցու պաշտոնական ներկայացուցիչ Տ. Խաժակ Արք. Պարսամյանը։
Նախատեսված են մի շարք հանդիպումներ Քույր Եկեղեցիների առաջնորդների և այլ բարձրաստիճան եկեղեցականների հետ, որոնց թվում՝ Տ․Տ․ Բարդուղիմեոս Ա. Ուղղափառ Եկեղեցու Տիեզերական Պատրիարքը, Քենթնբերիի Արքեպիսկոպոս Ջասթին Ուելբիին, Սբ․ Աթոռի Քրիստոնեական միասնության խթանման խորհուրդի նախագահ Կարդինալ Կուրտ Կոխը և Արևելյան Եկեղեցիների ժողովի պրեֆեկտ Կարդինալ Լեոնարդո Սանդրին։
Հիշեցնենք, որ Վեհափառ Հայրապետը վերջին անգամ Վատիկան այցելեց մոտ մեկ տարի առաջ՝ սեպտեմբերի 27-ին, բայց ադրբեջանա-թուրքական ռազմական ագրեսիայի պատճառով ստիպված եղավ ընդհատել իր այցը և Պապի հետ տեսակցությունից հետո, նույն օրը վերադարձալ Մայր Աթոռ Սուրբ Էջմիածին։
Միջազգային միջկրոնական համաժողովի բացումը տեղի կունենա այսօր հետկեսօրին, ժամը 17-ին Հռոմի «Լա Նուվոլա» կոնգրեսների կենտրոնում։
