Եզդիները աջակցել են Արցախին
Typography
- Smaller Small Medium Big Bigger
- Default Helvetica Segoe Georgia Times
- Reading Mode
Այսօր առավոտյան եզդիական համայնքի ներկայացուցիչները Եզդիների ազգային միության նախագահ Ազիզ Թամոյանի գլխավորությամբ բողոքի ակցիա կազմակերպեցին Հայաստանում ԱՄՆ դեսպանատան դիմաց։ Եզդիական համայնքն ԱՄՆ ղեկավարությանը կոչ արեց ուշադրություն դարձնել Արցախում տեղի ունեցող իրադարձություններին և Ադրբեջանին ստիպել դադարեցնել ռազմական գործողությունները։Ռազմական գործողությունների դադարեցման պահանջով բողոքի ակցիաները, ըստ կազմակերպիչների, պարբերական են լինելու։ «Դադարեցրեք այս կրակը։ Դադարեցրեք և նստեք սեղանի շուրջ, ԵԱՀԿ Մինսկի համանախագահող երկրների և միջազգային կառույցների հետ քննարկեք, հարցի լուծումը գտեք։ Խնդիրը քննարկել մարդկային ձևով, ոչ թե գիշատիչ մեթոդներով։ Օրական արյուն է թափվում, հարյուրավոր մարդիկ են ֆիզիկապես բնաջնջվում։ Ինքս՝ որպես Եզիդների ազգային միության նախագահ, կրկնում եմ՝ պետք է դատապարտել նաև Թուրքիայի և Ադրբեջանի ղեկավարություններին, նրանք ահաբեկիչներ են։ Մենք պահանջում ենք դրանց ճանաչել որպես տեռորիստական երկրների ղեկավարներ»,-նշեց Եզդիների ազգային միության նախագահ Ազիզ Թամոյանը։
Ազիզ Թամոյանն ընդգծեց, որ եթե գերտերությունները չդադարեցնեն Արցախի նկատմամբ ոտնձգությունները, աշխարհում առավել սարսափելի իրավիճակ կստեղծվի, քանի որ այդ ահաբեկիչները կմտնեն նաև այլ երկրներ։
Եզդիների ազգային միության նախագահի խոսքով՝ խնդիրը չկարգավորելու դեպքում եզդիները հացադուլ կսկսեն, քանի որ աշխարհի աչքի առաջ հայերի նկատմամբ բարբարոսություն է տեղի ունենում։ «Աշխարհի բոլոր եզդիներին և Հայաստանում ապրող մեր եզդիներին կոչ եմ անում՝ միացեք մեր հայ եղբայրներին»,-ասաց նա։
Հայաստանի եզդիական համայնքի հոգևոր առաջնորդ Բրո Հասանյանը ևս ԱՄՆ ղեկավարությանը կոչ արեց միջոցներ ձեռնարկել՝ դադարեցնելու պատերազմական գործողություններն Արցախում։ Ասաց՝ Արցախը հայկական հող է, որոշել է լինել անկախ պետություն։ «Եզդի ժողովուրդը 5-րդ դարից մինչ օրս եղել է հայ ժողովրդի կողքին և կլինի մինչև վերջ։ Որպես շեյխ՝ ամբողջ աշխարհի եզդիներին կոչ եմ անում միանալ հայ ժողովրդին։ Հայ ժողովուրդը մեր եղբայրներ են, մեր բարեկամներն են։ Հայաստանում եզդիներն ապրում են ինչպես Շանգալում։ Աշխարհի ոչ մի պետությունում եզդիները նման հնարավորություն չունեն»։
Բրո Հասանյանը վստահեցրեց, որ պայքարելու են, Արցախից մի բուռ հող չեն տալու Ադրբեջանին և նրան աջակցող Թուրքիային, ահաբեկչական խմբավորումներին։ Ասաց՝ Ղարաղաբը մերն է, մերն էլ կլինի, թեկուզ մինչեւ վերջին հայն ու վերջին եզդին կռվի։
Օրեր առաջ ադրբեջանական մամուլում հրապարկվել էին առաջնագծում կռվող եզդիների լուսանկարները՝ ներկայացվելով իբրև ահաբեկիչներ։ «Երիտասարդ եզդիներ» ՀԿ-ի նախագահ Սաիդ Ավդալյանն, անդրադառնալով ադրբեջանական կողմի այդ մեղադրանքներին, ասաց՝ եզդիները Հայաստանի լիիրավ քաղաքացիներ են, մեկնում են առաջանագիծ՝ պաշտպանելու իրենց ընտանիքներն ու երկիրը, որտեղ բնակվում են։ «Հայաստանը և Արցախը նաև մեր հայրենիքն են։ Մեր հայրենիքի անվտանգության պահպանումը նաև մեր պարտավորությունն է»,-ասաց նա։ Սաիդ Ավդալյանի խոսքով՝ եզդիական երկրորդ կամավորական ջոկատն է արդեն կազմավորվել և օրերս պատրաստվում է մեկնել Արցախ։ Ասաց՝ Հայաստանում ապրող եզդիները կռվում են առաջնագծում, իսկ արտերկրում ապրող եզդիները մասնակցում են բողոքի ակցիաներին՝ Արցախում տեղի ունեցող պատերազմը, Արցախի նկատմամբ ահաբեկչական գործողությունները դադարեցնելու պահանջով։
ԱՄՆ դեսպանատան աշխատակիցներից մեկը մոտեցավ ցուցարարներին, տեղեկացավ նրանց պահանջների մասին, ապա ցույցի երկու մասնակիցներ՝ ի դեմս Եզդիների ազգային միության նախագահ Ազիզ Թամոյանի, հանդիպեցին դեսապանատան քաղաքական բաժնի ներկայացուցիչների հետ։ Նրանք դեսպանատանը ներկայացրին եզդիների պահանջները։
