Էստոնիայի միջազգային նկարիչների միությունը հիմնադրվել է 2007 թվականին հայ նկարիչ Արսեն Քլյանի նախաձեռնությամբ: Տարեցտարի այն ընդլայնվել է՝ մասնաճյուղեր ունենալով աշխարհի շուրջ 40 երկրներում: Այն միավորում է բազմաոճ ու բազմաժանր բազմաթիվ արվեստագետների: Սեպտեմբերի 13-ին Երևանի Զորավոր Սուրբ Աստվածածին եկեղեցու հարակից տարածքում կազմակերպվեց միության 13-րդ ամյա հոբելյանին նվիրված՝ Հայաստանում ապրող ու ստեղծագործող անդամների նկարների «Աստվածային լույսը արվեստում» խորագրով ցուցահանդեսը: Այն անցկացվում էր Սուրբ Խաչի տոնին, որը ցուցահանդեսին առանձնակի կարևորություն էր հաղորդում: Ցուցահանդեսը տեղի ունեցավ եկեղեցու հոգևոր հովիվ Տեր Գրիգոր քահանա Գրիգորյանի աջակցությամբ:
Ցուցահանդեսի գաղափարը աստվածային լույսը գույնի, գծի ու պատկերի միջոցով մարդկանց հաղորդելն էր: Ցուցահանդեսի նպատակն էր՝ վերահաստատել հաղորդակցությունը գեղեցկության հետ և փոխանցել կյանքի ու գույների ներդաշնակության բերկրանքը:
Ցուցահանդեսին մասնակցում էին վաստակաշատ և շնորհալի նկարիչներ՝ Խաչատուր Ազիզյանը, Մարտին Ակողլյանը, Փայլակ Վանիկյանը, Կայծակ Վանիկյանը, Այսեր Մաթևոսյանը, Քրիստինա Օգանեզզը, Անուշ Բաբայանը, Հերմինե Նավասարդյանը, Տաթև Պետրոսյանը և Լիլիթ Տոնականյանը: Յուրաքանչյուր նկարիչ յուրօրինակ ոճով արտահայտում էր աստվածային լույսի ընկալումն իր ստեղծագործություններում:
Տեր Գրիգոր քահանա Գրիգորյանը ողջունեց Էստոնիայի միջազգային միության ցուցահանդեսի նախաձեռնությունը՝ նշելով արվեստի կարևորությունն ու եկեղեցու և արվեստագետների հոգևոր հաղորդակցության ու համատեղ ձեռնարկների ավանդական դարձնելու անհրաժեշտությունը: Տեր Գրիգորը ասաց նաև, որ հաճելի զուգադիպությամբ այդ օրը լրանում էր իր քահանայական ձեռնադրության 15 տարին և գրքեր նվիրեց նկարիչներին:
Անուշ Բաբայանը խոսեց Էստոնիայի միջազգային միության մասին, հայտնեց միության նախագահ Արսեն Քլյանի բարեմաղթանքները: Նա Տեր Գրիգոր քահանա Գրիգորյանին հանձնեց միության շնորհակալագիրը, իսկ Մարտին Ակողլյանին՝ միության անդամության վկայագիրը:
Ցուցահանդեսի ընթացքում ելույթ ունեցավ հանրահայտ երգիչ, երգահան Վահան Արծրունին: Նրան նվագակցում էր ֆլեյտահար Նելլի Մանուկյանը: Հնչեցին երգեր «Կոմիտաս. Տասը հայտնություն» երգաշարից: Կոմիտասյան բառերով գրված հոգեզմայլ երաժշտությամբ եկեղեցու շուրջ թևածում էր աստվածային լույսը:
Զորավոր Սուրբ Աստվածածին եկեղեցու սրբազան տարածքում՝ արվեստի միջոցով փոխանցվող աստվածային լույսի շնորհիվ մարդկանց հոգիները լցվել էին հույսով, հավատով ու սիրով: Աշխարհասփյուռ համաճարակի տագնապը, ինչպես խավարը՝ լույսից, իսպառ ցրվել էր:
Հ.Նավասարդյան
