Չեխ սենատորները վերահաստատեցին իրենց դիրքորոշումը՝ Հայոց ցեղասպանության դատապարտման հարցում

 

Հուլիսի 21-ին Պրահայում Հայաստանի դեսպանությունում կայացավ Չեխիայի Խորհրդարանի Սենատի անդամների և Չեխիայի հայ համայնքի ներկայացուցիչների բարեկամական հանդիպում, որին մասնակցություն բերեցին Չեխիայի Խորհրդարանի Սենատի փոխնախագահներ Միլան Շտյեխն ու Միլուշե Հորսկան, Պատգամավորների պալատի Չեխիա-Հայաստան միջխորհրդարանական բարեկամության խմբի նախագահ Մարեկ Բենդան, սենատորներ ու Սենատի աշխատակազմի աշխատակիցներ, դեսպանության չեխ բարեկամներ, Կենտրոնական Եվրոպայի և Սկանդինավիայի Հայրապետական Պատվիրակ Գերաշնորհ Տիրան եպիսկոպոս Պետրոսյանը և  Չեխիայի հայ համայնքային կառույցների ներկայացուցիչներ։

 

Ինչպես տեղեկանում ենք Պրահայում Հայաստանի դեսպանության ֆեյսբուքյան էջից, իր ողջույնի խոսքում դեսպան Աշոտ Հովակիմյանը Հայաստանի և Չեխիայում հայ համայնքի անունից Չեխիայի Սենատին և ներկա սենատորներին հայտնեց հայկական կողմի խորին երախտագիտությունը՝ Հայոց Ցեղասպանության դատապարտման վերաբերյալ Սենատի կողմից ընդունված բանաձևի կապակցությամբ։

 

Դեսպանն առանձնակի շեշտեց նման ոճրագործությունների պատշաճ դատապարտման կարևորությունը, հատկապես՝ ներկայիս պայմաններում, երբ ականատես ենք լինում տարածաշրջանում պատերազմի հրահրմանն ու ցեղասպան մտադրությունների առաջմղմանը՝ ներկայացնելով հայ-ադրբեջանական սահմանին տիրող իրադրությունն ու Ադրբեջանի և Թուրքիայի ռազմատենչ ու հակամարդկային հայտարարությունները:

 

Ներկաներին իրենց ողջույնի խոսքը հղեցին Սենատի փոխնախագահներ և բանաձևի նախաձեռնողներ Միլան Շտյեխն ու Միլուշե Հորսկան, ովքեր կրկին վերահաստատեցին իրենց համոզմունքը Հայոց Ցեղասպանության դատապարտման կարևորության հարցում։

 

Գերաշնորհ Տիրան եպիսկոպոս Պետրոսյանը ներկաներին դիմեց ողջույնի խոսքով՝ կարևորելով ցեղասպանության դատապարտումն ու խաղաղության ու համերաշխության հաստատումը։

 

Չեխ պատվավոր հյուրերին չեխաբնակ հայազգի օպերային երգչուհի, սոպրանո Վարինե Մկրտչյանի կատարմամբ նվիրվեց Կոմիտաս Վարդապետի ,,Ծիրանի ծառ,, երգը։ Հանդիպումն անցավ ջերմ և բարեկամական մթնոլորտում։

 

orer.eu

 

Լուսանկարները՝ ՕՐԵՐ-ի