Հայերեն

14
Ուր, Մրտ

Նորություններ
Typography
  • Smaller Small Medium Big Bigger
  • Default Helvetica Segoe Georgia Times
Տավուշի մարզում հուլիսի 12–ին եւ 13–ին հայ–ադրբեջանական սահմանում տեղի ունեցած բախումների եւ ռազմական գործողությունների ընթացքում տարբեր տվյալներով ադրբեջանական կողմը բազմաթիվ զոհեր տալով, ռազմական ու դիրքային կորուստներ կրելով հետ շպրտվեց: Հայկական բանակը իր առջեւ դրված պարտականությունները կատարեց լիակատար հաջողությամբ՝ մի անգամ եւս ապացուցելով, որ ագրեսորը կպատժվի խստագույն կերպով:
Այնուհանդերձ «Ադրբեջանական կողմը շարունակում է իր ագրեսիվ գործողությունները հայ-ադրբեջանական սահմանին՝ դիտավորյալ թիրախավորելով քաղաքացիական ենթակառուցվածքներն ու բնակչությունը և ընդլայնելով լարվածության աշխարհագրությունը», հայտարարել է Հայաստանի ԱԳՆ խոսնակը:
Ադրբեջանի նախագահը ռազմական դաշտում ստացած ուժեղ հարվածից հետո իր դեմքը ադրբենջանցիների մոտ չկորցնելու մտավախությամբ սկսել է թիրախավորել խաղաղ բնակչությանը՝ փաստացի վարելով ահաբեկչական մարտավարություն: Նրան մնում է միայն այն, որ իր ագրեսիայի մեղքը բարդի Հայաստանի վրա, միջազգային եւ ուժային կենտրոններից աջակցություն ստանալու ակնկալիքներով:
Սակայն Մինսկի խմբի համանախագահները, Միացյալ Նահանգները, Ռուսաստանը, Եվրոմիությունը եւ միջազգային այլ կառույցները դատապարտելով բախումները, երկու կողմերին էլ զսպվածության կոչեր ուղղեցին: Գործնականում թե համանախագահ երկրները, թե Իրանը հայտարարեցին կրակը անհապաղ դադարեցնելու անհրաժեշտության մասին:
Այս միջոցին միայն Թուրքիան էր, որ իր արտաքին գործերի նախարարի միջոցով, հերթական միակողմանի հայտարարություններով, քննադատության թիրախ է դարձրել ՀՀ զինված ուժերի գործողությունները՝ որակելով դրանք «ագրեսիվ ազգայնամոլական գաղափարների նոր դրսևորումներ»: Այսպիսով Թուրքիան խրախուսում է Ադրբեջանի սադրիչ գործողությունները ասելով, որ Թուրքիան իր «ողջ հնարավորություններով» կշարունակի կանգնած մնալ Ադրբեջանի կողքին:
Այսպիսով մի անգամ եւս փաստվում է, որ Թուրքիան Արցախի հարցի շուրջ անվերապահորեն պաշտպանում է Ադրբեջանի շահերը եւ հետեւաբար չի կարող մնալ Մինսկի խմբի մեջ ներգրավված 11անդամ պետությունների շարքում, որի անդամակցության պայմաններից է անկողմնակալությունը:
Թուրքիան այն երկիրը չէ, որ իրեն բարոյական իրավունք վերապահի մյուսներին մեղադրելու ազգայնամոլության եւ ագրեսիվության մեջ: Հայոց դեմ անցյալ դարի առաջին ցեղասպանությունը կատարած պետության իրավահաջորդը լինելով, Թուրքիա կոչվող երկրի իշխանությունները շարունակելով սուլթան Համիդների, Էնվերների, Թալեաթ փաշաների ու Քեմալների որդեգրած ցեղասպանական քաղաքականությունը, այսօր հասել է մինչեւ սուլթանի տիտղոս ստանալու մարմանջով վառվող Էրդոգանին: Եվ ահա այս մարդը Հայաստանին մեղադրում է «ագրեսիվության, ազգայնամոլության եւ տարածաշրջանի անկայունացման» մեջ:
Բավական է միայն նշել Թուրքիայի կողմից Սիրիայի տարածքային ամբողջականության խախտումը, հարեւան երկրների անվտանգության սպառնացումը, Կիպրոսի բռնագրավումը, Լիբիա ուղարկած ահաբեկչական խմբավորումները, տասնյակ տարիներ ի վեր Հայաստանի հետ սահմանի փակումը, Իրաքի սահմանները բազում անգամ խախտած ու օդուժով ռմբակոծությունները:
Էրդողանի իշխանությունը ցինիկաբար փորձում է իր նեոօսմանական ծավալապաշտական քաղաքականությունն ու գաղափարները քողարկել բոլոր հարեւան երկրներին անհիմն մեղադրանքներ հնչեցնելով: Այն երկրներին, որոնք ձգտում են տարածաշրջանի կայունացմանն ու խաղաղությանը:
Էրդողանն իր ազգայնա–կրոնամոլական գաղափարը բյուրեղացրեց Սուրբ Սոֆիան մզկիթի վերածելու որոշումով, անտեսելով ողջ միջազգային հանրության բողոքի ձայնը:
Այս մասին կանդրադառնանք առանձին:
 
Եվրոպայի հայերի համագումարի մամլո գրասենյակ
14 հուլիս 2020
Թուրքիա Ադրբեջան Եվրոպայի հայերի համագումար