Լիտվայի եւ Հայաստանի մշակութային կապերի սերտացման նպատակով ինչպես մեր երկրում, այնպես էլ Լիտվայում գրեթե ամեն տարի կազմակերվում են տարրաբնույթ միջոցառումներ՝համերգներ, ցուցահանդեսներ, գրական հանդիպումներ, գրքերի շնորհանդեսներ, փոխադարձ այցելություններ և այլն:
Շատ գեղեցիկ միջոցառմանն ականատեսն եղանք նոյեմբերի 11-ին մշակութասեր հասարակության ամենասիրելի վայրերից մեկում՝«Նարեկացի» արվեստի միությունում: Այստեղ էին հավաքվել տարբեր սերունդների ներկայացուցիչներ,մտավորականներ, հասարակական գործիչներ,իսկական մշակույթ գնահատող ու ընդունող մարդիկ՝մասնակցելու «Լիտվան մոտիկից» խորագիրը կրող ցուցահանդես-համերգին: Միջոցառումն իրականացվել էր «Լիտվական համայնք» մշակութային հասարակական կազմակերպության նախագահ Լիաննա Մանվելյանի նախաձեռնությամբ:
Այստեղ ներկայացված էին հայաստանաբնակ լիտվացիների ու սիրված նկարիչ Ստեփան Հակոբյանի լուսանկարները: Միջոցառման բացման ու ողջույնի խոսքով հանդես եկավ «Նարեկացի» արվեստի միության ցուցահանդեսների բաժնի պատասխանատու-համակարգող արվեստաբան Տաթևիկ Համբարձումյանը՝ ներկայացնելով միջոցառումը, կազմակերպիչներին՝ հույս հայտնեց,որ նմանատիպ միջոցառումները կլինեն շարունակելի՝սերտացնելու Հայաստան-Լիտվա մշակութային ու հասարակական կապերը:
Երաժշտական գեղեցիկ կատարումներով հանդես եկան Մխիթար Սեբաստացի կրթահամալիրի սաներն, ինչպես նաև երաժշտական կատարումներ և թատերականացված պարեր:Երեկոյին մասնակցեցին Դալիա Տաուրինկաիտեն, Գաբրիելա Քեմբելը, Յոնաս Քեմբելը, Ցոլակ Հակոբյանը, Հռիփսիմե Հակոբյանը, Մարիա Ալավերդյանը, Նելլի Հարությունյանը, Լիլիա Հարությունյանը, Գագիկ Ղազարյանը և Լիլիթ Ղազարյանը:
Միջոցառման վերջում Լիաննա Մանվելյանն երախտիքի խոսքերն ուղղեց հյուրընկալ մշակութային օջախից՝ հույս հայտնելով,որ նմանատիպ ծրագրերը կլինեն շարունակելի՝պահպանելու հայ ու լիտվական դարավոր մշակույթի ավանդույթներն ու պատմական անցյալը:
Գարիկ Ավետիսյան
Լուսանկարները Սիրարփի Կարապետյանի