Նկարչուհի Զարուհի Մխիթարյանի աշխատանքներն այսուհետ վաճառվում են Լիսաբոնի Գալուստ Գյուլբենկյան հիմնադրամի թանգարանի հուշանվերների խանութում։ Սա առաջին դեպքն է, երբ հիմնադրամի թանգարանը հայ արվեստագետի գործերը այլ հուշանվերների շարքում ներկայացնում է թանգարան այցելած զբոսաշրջիկներին։
Զարուհին 1995 թ ավարտել է Երևանի Գեղարվեստի Պետական Ակադեմիան՝ դառնալով առաջին շրջավարտներից մեկը՝ ստանալով 1990թ բացված Հագուստի Մոդելավորման ֆակուլտետի տեքստիլի գեղարվեստական ձևավորման մասնագետի վկայական։
Մեզ հետ զրույցում Զարուհին նշում է, որ դեռևս ուսանողական տարիներին աշխատել է հայկական նորաձևության նորաստեղծ ընկերությունների հետ՝ նկարելով էսքիզներ, մշակելով և կարելով հավաքածուների նմուշները։
,,Դեռեւս 2003թ. ամուսինս՝ Արա Բաբայանը՝ հայտնի նկարիչներ Յուրի Բաբայանի և Լաուրա Ավետիսյանի որդին, ստեղծեց առաջին հայկական արվեստի կայքը՝ “Artmenia”-ն, որտեղ ներկայացվում և ցուցադրվում էին ժամանակակից նկարիչների(այդ թվում իմ ) և արհեստագործերի աշխատանքները արտերկրում։ Այդ տարիներին Գալուստ Գյուլբենկյան Հիմնադրամի հայկական բաժինը ինձ պատվիրեց Հայաստանի եկեղեցիների ջրաներկ աշխատանքների շարք։ Իսկ այս տարի, երբ նշվում էր Գ.Գյուլբենկյանի 150-ամյակը՝ Հիմնադրամի և թանգարանի դիզայնի պատասխանատուն առաջարկեց , որ իբրեւ հայ նկարիչ ներկայացնեմ մեկ աշխատանք։
Մեծ սիրով ընդունեցի առաջարկը և Գալուստ Գյուլբենկյանի հայկական հավաքածուի մի քանի թանգարանային նմուշներից ընտրեցի 18 դարի Քյոթահիայի նկարազարդ լուսամփոփը: Վերամշակված և ձեռքով նկարված, այնուհետև թվայնացված և մետաքսե շարֆերի վրա տպագրված զարդանախշերն ոգեշնչված են հայկական լուսամփոփից: Քյոթահիայի հայկական հախճապակու արվեստը (16-20-րդ դարերը) հայտնի է իր յուրօրինակությամբ և ստեղծարարությամբ: Այս արտադրությունը զարգացել է մոտ չորս դար և զարգանում է մինչ այսօր, Քյոթահիայի հախճապակին կարելի է գտնել տարբեր միջազգային հավաքածուներում: Ինձ համար մեծ պատիվ և հաճույք էր նկարել այն և ինչ-որ կերպ առնչվել այդ պատմությանը և Գալուստ Գյուլբենկյանի հզոր ժառանգությանը: Իմ երախտագիտությունն եմ հայտնում այս դիզայնն իրականացնելու առաջարկի համար, ինչի արդյունքում աշխատանքնս վաճառվում է Գալուստ Գյուլբենկյանի հիմնադրամի և թանգարանի խանութներում»,- պատմում է Զարուհի Մխիթարյանը:
Անցած տարիների ընթացքում նա մի քանի անգամ մասնակցել է Հայաստանի Նկարիչների Միության գարնանային ցուցահանդեսներին,ստեղծել է մետաքսյա և կաշվե զարդերի հավաքածուներ, շարունակում է նկարել շարֆեր, ամուսնու ստեղծած հայտնի “Artmakers” ձեռագործ յուրօրինակ կահույքի ընկերությունում նկարազարդում է նաև կահույք։ Նրա աշխատանքները վաճառվում են տարբեր երկրներում ։
Խոսելով ընտանիքի մասին ,Զարուհին հպարտությամբ նշեց, որ դուստրը՝ Տաթև Բաբայանը, շարունակել է ընտանեկան ավանդույթները, եւ գերազանց սովորում է Տոկիոյի աշխարհահռչակ “Bunka” արվեստի համալսարանում` իր լուման ներդնելով Ճապոնիայի համար անծանոթ հայկական արվեստը և մշակույթը ներկայացնելու գործում։
ՕՐԵՐ
