ՀՀ ԱԳ նախարար Արարատ Միրզոյանի ուղեկցությամբ Ավստրիայի եվրոպական և արտաքին գործերի դաշնային նախարար Ալեքսանդր Շալենբերգը այցելել է Հայոց ցեղասպանության հուշահամալիր և հարգանքի տուրք մատուցել Ցեղասպանության զոհերի հիշատակին:
Ավստրիայի Հանրապետությունը աջակցում է Հարավային Կովկասում խաղաղության և կայունության հաստատմանը և շարունակելու է հոգ տանել ու դրսևորել իր նվիրումը տարածաշրջանին և Հայաստանին: «Արմենպրես»-ի հաղորդմամբ՝ այդ մասին Հայաստանի արտգործնախարարի հետ հանդիպման արդյունքներով տեղի ունեցած մամուլի ասուլիսին հայտարարեց Ավստրիայի Հանրապետության եվրոպական և արտաքին գործերի դաշնային նախարար Ալեքսանդր Շալենբերգը:
Ավստրիացի նախարարն ընդգծեց, որ Ավստրիան խրախուսում է տարածաշրջանում հակամարտությունների և առկա հիմնախնդիրների լուծմանը, այդ թվում՝ հայ-թուրքական հարաբերությունների կարգավորման նոր երկխոսությանը: Շալենբերգի խոսքով՝ հայ-թուրքական հարաբերությունների կարգավորումը մեծ քայլ կլինի ողջ ռեգիոնի համար:
«Մենք պետք է աշխատենք լարվածությունը թուլացնելու, վստահություն կառուցելու համար տարածաշրջանում: Ըստ իս՝ շատ հետաքրքրական է այն տարրը, որ գիտակից քայլեր են արվում ձեր հարևան Թուրքիայի հետ հարաբերությունների նորմալացման ուղղությամբ, որը մեծ քայլ կլինի ողջ ռեգիոնի և Հայաստանի ժողովրդի համար», - ասաց Ավստրիայի արտգործնախարարը:
Ավստրիայի Հանրապետության եվրոպական և արտաքին գործերի դաշնային նախարար Ալեքսանդր Շալենբերգի գլխավորած պատվիրակությունը երկօրյա աշխատանքային այցով Հայաստանում է: Այցը նպատակաուղղված է երկկողմ հարաբերությունների հետագա զարգացմանն ու խորացմանը, դրանց որակական նոր լիցք հաղորդելուն:
Այսօր՝ փետրվարի 2-ին, Արտաքին գործերի նախարարությունում տեղի է ունեցել Հայաստանի ԱԳ նախարար Արարատ Միրզոյանի և Ավստրիայի ԱԳ նախարար Ալեքսանդր Շալենբերգի հանդիպումը, որից հետո նախարարները հանդես են եկել համատեղ մամուլի ասուլիսով: Արարատ Միրզոյանի ուղեկցությամբ Ալեքսանդր Շալենբերգը այցելել է Հայոց ցեղասպանության հուշահամալիր և հարգանքի տուրք մատուցել Ցեղասպանության զոհերի հիշատակին: Ավստրիայի արտգործնախարարի այցի շրջանակներում նախատեսված են հանդիպումներ նաև Հայաստանի վարչապետի և Ազգային ժողովի նախագահի հետ:
ՀՀ ԱԳ նախարար Արարատ Միրզոյանի խոսքը և պատասխանները լրագրողների հարցրեին Ավստրիայի ԱԳ նախարարի հետ համատեղ մամուլի ասուլիսի ժամանակ