«Իմ հայրենիք» խորագրով ֆոտոցուցահանդես Մարտակերտում՝ չեխ լուսանկարիչների մասնակցությամբ

 

Աշխարհի շուրջ 6 երկրից հայ և օտարազգի 24 լուսանկարիչ իրենց աշխատանքներն այս երկու օրվա ընթացքում ներկայացրել էին մարտակերտցիների դատին։

Ըստ Ենգոյանի` ցուցահանդեսի միտքն առաջացել էր պատերազմի օրերին, քանի որ մարդիկ պետք է հասկանային, որ պատերազմն ավարտվելու է, իսկ իրենք հայրենիք են պաշտպանում, և հայրենիքը սա է, որտեղ կյանքը կա ու շարունակվում է։ Ցուցահանդեսը նախատեսվել էր բացել Շուշիի Սբ. Ղազանչեցոց եկեղեցու բակում, բայց չհասցրեցին։

Արցախում ցուցահանդես բացելու կոչին միացան լուսանկարիչներ տարբեր երկրներից` Հայաստանից, Ռուսաստանից, Սլովակիայից, Չեխիայից, Իսրայելից, Իտալիայից և, իհարկե, Արցախից, մարդիկ, ովքեր եղել են այստեղ և ովքեր չեն եղել։ Նրանց համար ցուցահանդեսը մի նախաձեռնություն էր արցախցիներին սատարելու և այդ դժվարին պահին նրանց կողքին լինելու համար։

Լուսանկարներում ներկայացված են կադրեր Հայաստանից և Արցախից, ինչպես նաև հեղինակների հայրենիքներից: Խաղաղ առօրյան` բնություն, քաղաքներ, եկեղեցիներ և մարդիկ, այն ամենը, ինչով ապրում, ուրախանում և տխրում են, և պատերազմից դրվագներ, որտեղ կռվում և պաշտպանում են, որովհետև դա է իրենց հայրենիքը,-նշեց Ա.Ենգոյանը:

Ֆոտոցուցահանդեսը Մարտակերտից սկսեցին Արմեն Պետրոսյանի առաջարկով։ Նրա խոսքով` սովորաբար ամեն ինչ սկսվում է մայրաքաղաքից, այս անգամ համադրողներով պայմանավորվեցին բացառություն անել, սակայն մնացած քաղաքներում ևս կբացվի ցուցահանդեսը։

 

Մայիսի 21-ին ցուցահանդեսի բացմանը ներկա էին նաև Մարտակերտի շրջանի վարչակազմի աշխատակազմի ղեկավար Սասուն Հարությունյանը, ԿՍ բաժնի վարիչ Դավիթ Լալայանը։