«Շախմատային հանդիպումներ. Գաֆէսճեան պատանեկան խորհուրդն ընդդեմ արվեստագետների» նոր նախագծի մեկնարկը
Մարտի 11, 2020թ., Երևան. Գաֆէսճեան արվեստի կենտրոնը հայտարարում է «Շախմատային հանդիպումներ. Գաֆէսճեան պատանեկան խորհուրդն ընդդեմ արվեստագետների» նոր նախագծի մեկնարկը մարտի 13-ին, ժ. 16:00-ին Կենտրոնի Հատուկ միջոցառումների սրահում:
Երկու ամիս տևողությամբ աշխարհի ամենաինտելեկտուալ խաղերից մեկի՝ շախմատի մրցաշարի ընթացքում պատանիները կմրցեն իրենց նախընտրած արվեստագետների հետ: Նախագծի հաջորդ՝ ստեղծագործական փուլում, խաղում պարտված մասնակիցներն իրենց նախընտրած գեղարվեստական միջոցներով կպատկերեն հաղթանակ տարած մասնակցին:
Որպես նախագծի ամփոփում տեղի կունենա խաղում պարտված մասնակիցների ստեղծագործությունների ցուցադրություն ԳԱԿ-ի «Պատկերասրահ Մեկ»-ում:
Արդյունքում՝ հաղթանակը դառնում է երկուստեք. հաղթում է թե՛ պարտված նկարիչը, ում աշխատանքը ցուցադրվում է և թե՛ բուն հաղթողը, ում պատկերում են:
Մրցաշարն ուղիղ եթերով կհեռարձակվի ԳԱԿ-ի Facebook-յան էջում:
«Գաֆէսճեան պատանեկան խորհուրդն ակտիվորեն շարունակում է իր նախաձեռնությունները: Մեկնարկում է մեր պատանիների կողմից մշակված ևս մեկ յուրօրինակ նախագիծ՝ «Շախմատային հանդիպումներ. Գաֆէսճեան պատանեկան խորհուրդն ընդդեմ արվեստագետների»: Ծրագրի նպատակն է հնարավորություն ընձեռել պատանիներին այս նախագծի շրջանակներում իրենց հետաքրքրող հարցերի շուրջ զրուցելու արվեստագետների հետ: Բացի այդ, ծրագրի արդյունքում կստեղծվեն նոր արվեստանմուշներ և կիրականանա յուրահատուկ ցուցահանդեսային նախագիծ»,- նշում է Գաֆէսճեան արվեստի կենտրոնի գործադիր տնօրենի պաշտոնակատար Վահագն Մարաբյանը:
***
Գաֆէսճեան արվեստի կենտրոնի առաքելությունն է ժամանակակից արվեստի լավագույն նմուշները ցուցադրել Հայաստանում և աշխարհին ներկայացնել հայկական մշակույթի լավագույնը: 2009 թվականի նոյեմբերին տեղի ունեցած բացումից առ այսօր Գաֆէսճեան արվեստի կենտրոնը, հավատարիմ իր առաքելությանը, կազմակերպում է բազմազան ցուցահանդեսներ, ներկայացնում ժամանակակից արվեստի յուրօրինակ գործեր, իրականացնում ֆիլմերի ցուցադրություններ, համերգաշարեր, դասախոսություններ և կրթական ծրագրեր:
Գաֆէսճեան պատանեկան խորհուրդը 13-16 տարեկան երիտասարդների առաջնորդական խումբ է, որը ստեղծվել է 2017թ.՝ նպատակ ունենալով կառուցել շարունակական հարաբերություններ պատանիների հետ, կարևորել նրանց բազմապիսի հետաքրքրությունները և կարիքները՝ Կենտրոնը դարձնելով սիրելի վայր բոլոր դեռահասների համար, ներգրավել նրանց մշակութային միջավայրի մեջ որպես ակտիվ դերակատարների, միևնույն ժամանակ խթանել նրանց ստեղծարար մտածողությունը և տեսողական գրագիտությունը, նպաստել հաղորդակցման, թիմային աշխատանքի և առաջնորդական հմտությունների զարգացմանը: