Ատոմ Էգոյանը ՝ չեխական ,,Ֆեբիոֆեստի,, պատվավոր հյուր

 Մարտի 19-27-ը Պրահայում կանցկացվի  27-րդ միջազգային ,,Ֆեբիոֆեստ,, կինոփառատոնը։

Պրահայի Կարել 4-րդ հյուրանոցային համալիրում  տեղի ունեցած մամուլի ասուլիսում, կինոփառատոնի կազմակերպիչները  բացի ծրագրային ֆիլմերին ծանոթացումից, ներկայացրեցին նաեւ այս տարվա պատվավոր հյուրերին։

Կինոփառատոնը կբացվի  լեհ հայտնի կինոռեժիսոր Ագնեշկա Հոլանդի  ,, Շառլատանը,, ֆիլմով, որի պրեմիերան վերջերս տեղի ունեցավ ԲեռլինԻ կինոփառատոնում։

Փառատոնի բացման արարողությանը ներկա կլինի ամերիկացի հրեա կինոռեժիսոր Օրեն Մովերմանը, ով ոչ միայն կարժանանա Քրիստիան մրցանակի եւ այլեւ կներկայացնի իր ֆիլմերը։ Նույն մրցանակին կարժանանան նաեւ ամերիկացի  հանրահայտ դերասան Վուդի Հարրելսոնը, ճապոնացի  ճանաչված կինոռեժիսոր Հիրոկազու Կորե-եդուն, ով կինոփառատոնի ընթացքում կներկայացնի իր 9 ֆիլմերը։

Կինոփառատոնի գեղարվեստական ղեկավար Նիկոլայ Նիկիտինը, ով  հպարտությամբ նշեց նաեւ իր հայկական արմատների մասին , տեղեկացրեց, որ կինոփառատոնի պատվավոր հյուրը կլինի նաեւ հայկական ծագումով աշխարհահռչակ կանադացի կինոռեժիսոր, սցենարիստ, պրոդյուսեր Ատոմ Էգոյանը։ Կցուցադրվեն ոչ միայն հայ կինոռեժիսորի արդեն  հայտնի ,,Էկզոտիկա ,, եւ  ,,Լուսավոր գալիք,,  ֆիլմերը, այլեւ նրա վերջին  ժապավենը՝ ,,Պատվավոր հյուրը,,։  

Ատոմ Էգոյանը կժամանի Պրահա ընդամենը երեք օրով, կանցկացնի նաեւ վարպետության դաս։

Կինոփառատոնի Քրիստիան մրցանակին կարժանան նաեւ չեխ հայտնի դերասանուհի  Իվա Յանզուրովան  եւ սլովակ հանրահայտ դերասան Միլան Լասիցան։

Ինչպես արդեն տեղեկացրել էինք, այս տարվա Ֆեբիոֆեստում կլինեն նաեւ հարակից մշակութային ծրագրեր, իսկ կինոկատակերգությունների նոր մրցութային ծրագրի հաղթողին կորոշի 33 հոգուց բաղկացած հանդիսատեսների ժյուրին, որը գլխավորում հայտնի չեխ դերասանուհի Կլարա Մելիշկովան։

Կինոփառատոնի  շրջանակներում ցուցադրվող մեկ ֆիլմի տոմսը կարժենա 99 չեխական կրոն, բայց նաեւ հնարավոր կլինի ձեռք բերել հանդիսատեսի հավատարմագրում՝ 3, 5 կամ 9 օրերի համար, ինչը համապատասխանաբար կարժենա 699 կրոն, 999 կրոն եւ  1490 կրոն։ Այս հավատարմագրմամբ օրական կարող եք դիտել 3 ֆիլմ։  

Մարտի 30-ից մինչեւ ապրիլի 9-ը կինոփառատոնը  կշարունակվի Չեխիայի 13 այլ քաղաքներում։ Մանրամասներին եւ ծրագրին կարող եք ծանոթանալ febiofest.cz կայքէջում։

ՕՐԵՐ