Փետրվարի 27-ին Տալլիննի պատմական «Սևագլուխների տանը» տեղի ունեցավ «Խաչատրյան Տրիո»-ի համերգը՝ նվիրված հայ-էստոնական բարեկամությանը։ Այս մասին տեղեկանում ենք ՀՀ դեսպանությունից։
ՀՀ դեսպանության նախաձեռնությամբ և աջակցությամբ կազմակերպված միջոցառումը բալթյան երկրներում «Խաչատրյան Տրիո»-ի շրջագայության վերջին՝ հինգերորդ համերգն էր։
Միջոցառմանը ներկա Էստոնիայում հավատարմագրված դեսպաններ, Էստոնիայի օրենսդիր և գործադիր իշխանության մարմինների բարձրաստիճան պաշտոնյաներ, պատգամավորներ, քաղաքական և մշակութային գործիչներ, հայ համայնքի ներկայացուցիչներ։
Միջոցառման սկզբում ՀՀ դեսպանության երրորդ քարտուղար Միսակ Բալայանը ընթերցեց Էստոնիայում ՀՀ դեսպան Տիգրան Մկրտչյանի ուղերձը, որտեղ մասնավորապես նշված էր․
«Վերջին մեկ շաբաթվա ընթացքում «Խաչատրյան Տրիո»-ն բալթյան երկրներում հանդես եկավ չորս տպավորիչ համերգներով, որոնցից երեքը տեղի ունեցան Լիտվայում` Կաունաս Ֆիլհարմոնիայում, Պալեսիաուս Դվարասում և Վիլնյուսի մեծ դքսերի պալատում` ազդարարելով Վիլնյուսում և Կաունասում ՀՀ պատվավոր հյուպատոսության բացումը, իսկ երեկ` Լատվիայում, Ռիգայի ՎԵՖ մշակույթի պալատում: Առանց բացառության բոլոր համերգները անցան հիանալի մթնոլոտում և լեփ լեցուն հանդիսականների ներքո:
Այսօրվա համերգը մենք կցանկանայինք նվիրել հայ-էստոնական բարեկամությունը, որ տարեցտարի ավելի է ուժեղանում՝ ընդգրկելով համագործակցության նորանոր ոլորտներ: Տեղեկատվական տեխնոլոգիաների, առողջապահության, կրթության և մշակութային փոխանակման բնագավառում շարունակական համագործակցությունը ամուր հիմք է երկկողմ և ԵՄ շրջանակներում կապերի հետագա զարգացման համար:
Շատ հայերի համար Էստոնիան ընկալվում է որպես մի երկիր, որտեղ XIX դարի սկզբին Տարտուի համալսարանում սովորել է ժամանակակից հայոց լեզվի հիմնադիր Խաչատուր Աբովյանը: Աբովյանի հետ մեկտեղ, 19-րդ դարի հայ լուսավորության որոշ ներկայացուցիչներ սերտ կապի մեջ են եղել Էստոնիայի հետ, և ես ուրախությամբ հայտնում եմ, որ Տարտուի համալսարանը շարունակում ուսանողներ է ընդունել Հայաստանից:
Վերջում կցանկանայինք շնորհակալություն հայտնել համերգի աջակիցներին՝ Մշակույթի աջակցության եվրոպական հիմնադրամին, ՀՀ կրթության, գիտության, մշակույթի և սպորտի նախարարությանը և ERP Music-ին այս հրաշալի միջոցառումը համահեղինակելու համար»։
Նշանավոր տրիոյի համերգային կատարումն արժանացավ ներկաների ջերմ ընդունելությանը։
orer.eu
