«Ավրորա» ֆորումի շրջանակում Տաթևի վանական համալիրի այցելուները հնարավորություն ունեն ծանոթանալ Կոմիտաս Վարդապետի 150-րդ տարեդարձին նվիրված բացառիկ ցուցադրությանը:
Սեպտեմբերի 25, 2019 թ., Երևան, Հայաստան. «Կոմիտաս. հանճարի ճանապարհները» խորագրով ժամանակավոր ցուցադրությունը Տաթևի վանական համալիրի տարածքում՝ ձիթանում, բաց է այցելուների առջև այս տարվա սեպտեմբերից:
Այն կազմակերպվել է 2019 թ. հոկտեմբերի 14-21-ը Հայաստանում կայանալիք առաջին «Ավրորա» ֆորումին ընդառաջ «Հայաստանի Զարգացման Նախաձեռնություններ» IDeA հիմնադրամի «Տաթևի վերածնունդ» ծրագրի շրջանակում: Ցուցադրությունն իրականացվել է Կոմիտասի թանգարան-ինստիտուտի հետ համագործակցությամբ:
Ցուցադրությունը ներառում է Կոմիտաս Վարդապետի՝ Կովկասում, Եվրոպայում, Օսմանյան կայսրությունում և Եգիպտոսում տարբեր տարիներին արված լուսանկարներ և այդ վայրերում նրա գործունեությունը ներկայացնող տեքստային նյութեր:
Այս ցուցադրության շնորհիվ Տաթևի վանական համալիր այցելող զբոսաշրջիկները ծանոթանում են մեծն Կոմիտասի կենսագրությանը, ով համարվում է ժամանակակից հայկական դասական երաժշտության հիմնադիրը:
«Խորհրդանշական է, որ այս ցուցադրությունը բացվում է հենց Տաթևի վանական համալիրում, որը դարեր շարունակ եղել է Հայաստանի հոգևոր, կրթական և մշակութային կարևոր կենտրոններից մեկը: Կոմիտասը նաև մեծ ուսուցիչ ու մանկավարժ էր, ով իր գիտելիքներն ու հմտությունները տարածեց աշխարհի տարբեր անկյուններում»,-նշում է ցուցադրության համադրող, պատմական գիտությունների դոկտոր Հայկ Դեմոյանը:
Ցուցադրությունը ներկայացնում է Կոմիտասի ճանապարհորդությունների աշխարհագրությունը, հայ և օտարազգի մտավորականության հետ տարբեր քաղաքներում ունեցած շփումները: Լուսանկարներում Կոմիտասի կողքին կարելի է տեսնել հայտնի հայ մտավորականներ Հովհաննես Թումանյանին, Ավետիք Իսահակյանին, Ղազարոս Աղայանին, Արշակ Չոպանյանին, Վրթանես Փափազյանին, Գևորգ Բաշինջաղյանին, Ռուբեն Սևակին և այլոց:
Ցուցադրության լուսանկարչական նյութը տրամադրվել է Գուրգեն Գասպարյանի «Կոմիտաս Վարդապետ (1869-1935)» (Երևան, 2014թ.) գրքից:
Կոմիտասի 150-ամյակին նվիրված ցուցադրության մեջ ներառված են նաև Վարդապետին վերաբերող բնօրինակ նյութեր՝ հուշամեդալներ, գրքեր, նամականիշեր և Կոմիտասի լուսանկարներով փոստային բացիկներ:
Ցուցադրությունը այցելուների համար բաց կլինի մինչև տարեվերջ:
«Ավրորա» ֆորումի մասին
«Ավրորա» ֆորումը բացառիկ և հավակնոտ նոր ասպարեզ է, որը կոչված է խթանելու դրական զարգացումներ և նպաստելու մարդկության հավաքական ներուժի իրացմանը՝ միտված տեխնոլոգիական, գիտական, կրթական, սոցիալական և մարդասիրական ոլորտների հրատապ մարտահրավերների հաղթահարմանը:
Ֆորումի առանցքում են բազմաթիվ միջոցառումներ և քննարկումներ, որոնց շրջանակներում հեղափոխական առաջնորդներն ու աշխարհում փոփոխություն կերտողները կկիսվեն իրենց փորձով, մտքերով և տեսլականով, ինչը կբերի հստակ քայլերի և փոփոխությունների:
«Ավրորա» ֆորումը կկայանա Հայաստանում հոկտեմբերի 14-21-ը: Ֆորումի հեռահար օրակարգը կյանքի կկոչվի գործընկեր կազմակերպությունների հետ՝ գլոբալ մարտահրավերներին դիմագրավելու և տեղական զարգացում խթանելու համատեղ հանձնառությամբ: Ֆորումի հիմնական գործընկերներն են «Հայաստանի զարգացման նախաձեռնություններ» (IDeA) հիմնադրամը, Հայաստանի գիտության և տեխնոլոգիաների հիմնադրամը (FAST), «Ավրորա» մարդասիրական նախաձեռնությունը, Scholae Mundi համաշխարհային կրթական հարթակը, UWC Դիլիջան միջազգային քոլեջը և Ամերիաբանկը։
2019թ. «Ավրորա» ֆորումը համընկնում է Հայաստանի պատմության յուրահատուկ շրջանի հետ. անցյալ տարի քաղաքական իշխանության խաղաղ փոխանցման արդյունքում Հայաստանը հայտնվեց միջազգային հանրության ուշադրության կենտրոնում՝ վկայելով, թե ինչպես կարող է կրթված աշխատուժ ունեցող և պայքարի խաղաղ միջոցներին հանձնառու ժողովուրդը հասնել համազգային փոփոխությունների:
«Ավրորա» ֆորումը համահիմնադրել են Նուբար Աֆեյանը, Վարդան Գրեգորյանը և Ռուբեն Վարդանյանը` գլոբալ քաղաքացիների համար այն փոփոխությունների նոր՝ նշանակալի հարթակ դարձնելու ցանկությամբ: Ֆորումն աշխարհին է ներկայանում իր՝ ավելի քան 150 բարի կամքի դեսպաններով՝ գլոբալ առաջնորդներ, որոնք ներկայացնում են քաղաքականության, գիտության, կրթության, գործարարության, ժամանցի, արվեստի և այլ ոլորտներ՝ հանձնառու այսօրվա ու վաղվա սերնդի առջև կանգնած հրատապ և համընդհանուր մարտահրավերների հաղթահարմանը:
***
«Տաթևի վերածնունդ» ծրագրի մասին
«Տաթևի վերածնունդ» ծրագրի նպատակն է Տաթևի վանական համալիրի վերականգնումը, տեղական համայնքների զարգացումը և այս վայրի պատմամշակութային և հոգևոր նշանակությանը համապատասխանող անհրաժեշտ ենթակառուցվածքների ստեղծումը։